سعودی عرب میں ایک ہفتے کے دوران مختلف علاقوں سے ریزیڈنسی، لیبر قوانین اور سرحدی حفاظتی ضوابط کی خلاف ورزی کرنے والے تقریبا 13،801 افراد کو گرفتار کیا گیا ہے.
عرب نیوز کے مطابق یہ گرفتاریاں17 مارچ سے 23مارچ کے دوران سیکورٹی فورسز کے مختلف یونٹس اور جنرل ڈائریکٹوریٹ آف پاسپورٹ (جوازات) کی مشترکہ فیلڈ مہم کے دوران کی گئیں.
مزید پڑھیں؛ سعودی عرب میں خروج و عودہ (چھٹی) پرجانے والے دوسرے ویزے پر واپس آ سکتے ہیں؟
گرفتار ہونے والوں میں اقامتی قوانین کی خلاف ورزی کرنے والوں کی تعداد 7،953، سرحدی حفاظتی ضوابط کی خلاف ورزی کرنے والوںکی تعداد 4،023 اور لیبر قانون کی خلاف ورزی کرنے والوں کی تعداد 1،825 ہے.
کُل 175 افراد کو سرحد عبور کر کے مملکت میں داخل کرنے کی کوشش کے دوران گرفتار کیا گیا جن میں سے 61 فیصد یمنی، 28 فیصد ایتھوپیائی اور11 فیصد کا تعلق دوسری قومیتوں سے تھا.
سیکیورٹی فورسز نے 16 افراد کو بھی گرفتار کیا جو خلاف ورزی کرنے والوں کو منتقل کرنے اور انہیں پناہ دینے میں ملوث تھے۔
مزید پڑھیں؛ اقامہ کارڈ پر نام غلط لکھا گیا ہے، درستگی کیسے کروائیں؟
خلاف ورزی کرنے والوں کی کل تعداد، جو اس وقت تعزیری اقدامات کے تابع ہیں، 103,570 سے زائد ہیں جن میں 90,931 سے زیادہ مرد اور 12,639 خواتین شامل ہیں، جب کہ 90,649 خلاف ورزی کرنے والوں کے کیس ان کے سفارتی مشنوں کو بھیجے گئے تاکہ ان کی ملک بدری کے لیے سفری دستاویزات حاصل کی جاسکیں۔
وزارت داخلہ نے متنبہ کیا ہے کہ جو کوئی بھی سرحدی حفاظتی ضوابط کی خلاف ورزی کرتے ہوئے کسی کو مملکت میں داخل ہونے میں سہولت فراہم کرتا ہے، یا اسے نقل و حمل یا پناہ یا کسی بھی طرح سے کوئی مدد یا خدمات فراہم کرتا ہے، اسے زیادہ سے زیادہ 15 سال قید کی سزا دی جائے گی۔ 1 ملین ریال تک کا جرمانہ، اور نقل و حمل کے ذرائع، اور پناہ کے لیے استعمال ہونے والی رہائش گاہ کو ضبط کرنے کے علاوہ، مقامی میڈیا میں ان کے ناموں کی تشہیر بھی کی جائے گی.
