وزیراعظم عمران خان نے سابق فاسٹ باؤلر شعیب اختر اور پی ٹی وی سپورٹس کے اینکر پرسن نعمان نیاز کے درمیان آن ایئر گرما گرم بحث کا نوٹس لے لیا۔
وزیر مملکت برائے پارلیمانی امور علی محمد خان نے خبر کی تصدیق کرتے ہوئے انکشاف کیا کہ وزیراعظم نے بھی اس معاملے کا نوٹس لیا ہے اور کمیٹی کو فوری کارروائی کی ہدایت کی ہے۔
جیو نیوز کے پروگرام ’جیو پاکستان‘ میں گفتگو کرتے ہوئے ان کا کہنا تھا کہ عمران خان اس بات پر بھی ناراض ہیں کہ شو کے میزبان نے قومی اسٹار کی توہین کی۔
اپنے موقف پر روشنی ڈالتے ہوئے،علی محمد خان نے کہا: “یہ ایک ناخوشگوار واقعہ ہے، کوئی بھی ریاست سے بڑا نہیں ہے اور کوئی بھی اپنی طاقت کا غلط استعمال نہیں کر سکتا۔”
انہوں نے مزید کہا کہ وجہ کچھ بھی ہو کوئی کسی کی توہین نہیں کر سکتا ایک عام آدمی کی بھی اسی طرح عزت کی جانی چاہیے جس طرح کسی مشہور شخصیت، سیاست دان یا وزیر کی۔
انہوں نے کہا کہ ’’آپ کسی کو آن ائیر شو چھوڑنے کے لیے نہیں کہہ سکتے، یہ تکبر ہے،‘‘ انہوں نے مزید کہا کہ ڈاکٹر نیاز کو اپنی اورشعیب اختر کی قدر کا اندازہ لگانا چاہیے تھا۔
انہوں نے یاد کرتے ہوئے کہا کہ شعیب اختر نے پاکستان کا پرچم بلند کیا وہ واحد شخص تھا جس نے ہندوستانی عظیم بلے بازسچن ٹنڈولکر کو اسٹمپ کرنے کے بعد ہندوستان کو خاموش کرا دیا تھا۔
ڈاکٹر نیاز کو اختر کی توہین کرنے سے پہلے سو بار سوچنا چاہیے تھا، انہوں نے سوال کیا کہ بین الاقوامی کرکٹ کے عظیم کھلاڑیوں کے سامنے ہم اپنے قومی ستاروں کے ساتھ ایسا سلوک کرتے ہیں ؟
ان کا کہنا تھا کہ دنیا بھر کے لوگ اس شو کو دیکھ رہے تھے یہ پاکستان کے لیے بڑا دن تھا، ہماری ٹیم نے نیوزی لینڈ کو شکست دی تھی، ہر کوئی جشن منا رہا تھا اور یہ واقعہ ہو گیا۔
آن ایئر معاملے کو حل کرنے کے لیے شعیب اختر کی کوششوں کا اعتراف کرتے ہوئے انھوں نے کہا: “میں شعیب کی بھی تعریف کروں گا کیونکہ اس کی فطرت کے برعکس انھوں نے پرسکون انداز میں ردِ عمل دیا، حالانکہ وہ اپنی جارحیت کے لیے جانا جاتا ہے ۔
نعمان نیاز کے اس بیان پر روشنی ڈالتے ہوئے کہ وہ کسی اور کو شو کی میزبانی نہیں کرنے دیں گے،وفاقی وزیر نے کہا کہ نہ تو سرکاری چینل کسی کے باپ کا ہے اور نہ ہی یہ شو ۔
ہر کوئی شو دیکھ رہا تھا اور چینل قومی خزانے سے چل رہا ہے، کسی کو یہ کہنے کا حق نہیں کہ شو کی میزبانی کون کرے گا یا کون نہیں کرے گا ۔ انہوں نے زور دے کر کہا کہ پاکستان کے صدر اور وزیر اعظم بھی ایسا نہیں کر سکتے۔
انہوں نے مزید کہا کہ انہیں میڈیا نے بتایا کہ جمعرات کو پینل کے تمام ممبران اسٹوڈیو میں موجود تھے اورنعمان نیاز نے شو کو آگے نہیں بڑھنے دیا۔
علی محمد خان نے مزید کہا کہ “میری نعمان نیاز سے کوئی ذاتی رنجش نہیں ہے لیکن اسے ہمارے قومی ستارے کی توہین کرنے کا کوئی حق نہیں تھا ایسا کر کے اس نے پوری قوم کی توہین کی ہے۔”
انہوں نے کہا کہ اس حوالے سے تحقیقات کی جائیں گی اور فوری کارروائی کی جائے گی۔
