وزیراعظم عمران خان نے آرمی پبلک اسکول پشاور کے شہداء کی برسی کے موقع پر اس عزم کا اعادہ کیا کہ اے پی ایس کے شہداء کے والدین اور متاثرین کو مایوس نہیں کیا جائے گا۔
تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر آرمی پبلک اسکول پشاور کے شہداء کی برسی کے موقع پر اپنے پیغام میں کہا کہ دہشت گردوں نے سانحہ اے پی ایس میں 132 بچوں سمیت 140 سے زائد افراد کو شہید کیا، پاکستان نے دہشت گردی کو کامیابی سے شکست دی۔ اے پی ایس شہداء اور متاثرین کے والدین کو مایوس نہیں ہونے دیں گے، تشدد اور اسے آلہ کار کے طور پر استعمال کرنے والوں کی کوئی گنجائش نہیں۔
Dec 16, 2014, terrorists attacked & martyred over 140 ppl incl 132 children in APS,Peshawar. Pak has successfully defeated terrorism.I reiterate we will never let down the survivors & parents of our martyred children.There is zero tolerance for violence & those using it as a tool
— Imran Khan (@ImranKhanPTI) December 16, 2021
وزیراعظم نے کہا کہ یہ دن پاکستانی قوم کو اے پی ایس کے المناک سانحہ کی یاد دلاتا ہے۔ اس دن بزدل شرپسندوں نے قوم کے مستقبل اور نہتے بچوں کو شہید کیا۔ اے پی ایس کے بہادر اساتذہ طلبہ کے تحفظ کے لیے دیوار بن گئے۔
عمران خان نے کہا کہ بلاشبہ دہشت گردی کا کوئی مذہب یا قوم نہیں ہوتی، بزدلانہ سوچ معصوم بچوں کو مذموم مقاصد کے لیے استعمال کرسکتی ہے، آرمی پبلک اسکول کے شہداء کی قربانیاں رائیگاں نہیں گئیں۔
انہوں نے کہا کہ اس سانحہ کے بعد دہشت گردی کے خلاف بہادر قوم کے حوصلے مزید بلند ہوئے اور پوری قوم متحد ہوگئی۔
وزیراعظم نے کہا کہ قوم کا عزم، دشمن کے حوصلے متزلزل کرنے کی کوشش کو شکست دیں، عہد کریں کہ قوم فرقہ وارانہ، مذہبی، نسلی تعصب کے خاتمے کے لیے متحد ہو گی، قوم اپنی صفوں میں موجود عناصر کی نشاندہی کرے گی، ریاست اس کے ازالے میں مدد کرے گی۔
عمران خان نے کہا کہ اللہ تعالیٰ سے دعا ہے کہ وہ اے پی ایس کے شہداء کے درجات بلند کرے اور شہداء اے پی ایس کے اہل خانہ کو صبر جمیل عطا فرمائے۔
