آسٹریلوی سیکیورٹی ٹیم کا پاکستان میں سیکیورٹی انتظامات پر اطمینان کا اظہار کیا ہے۔
میڈیا نیوز کے مطابق آسٹریلوی سیکیورٹی ٹیم نے پنجاب سیف سٹیز اتھارٹی کا دورہ کیا۔ ٹیم کو میچز کے دوران سیکیورٹی انتظامات پر بریفنگ دی گئی۔
پی سی بی حکام کی جانب سے جدید ٹیکنالوجی کے استعمال اور سیکیورٹی اداروں میں تعاون پر بریفنگ دی گئی۔
آسٹریلوی سیکیورٹی ٹیم کو پاکستان کا دورہ کرنے والی ٹیموں کو فراہم کی جانے والی سیکیورٹی کی ویڈیو بھی دکھائی گئی۔ آسٹریلوی سیکورٹی ٹیم نے کیمروں کی مدد سے شہر بھر میں نگرانی کا سروے کیا۔
آسٹریلوی سکیورٹی ٹیم جس میں ڈریو بریڈن، بین اولیور اور بیلے سٹوارٹ شامل ہیں، کو سیف سٹیز اتھارٹی کی جانب سے یادگاری شیلڈ بھی پیش کی گئی۔
آسٹریلوی وفد کراچی میں پاکستان ویسٹ انڈیز کی ٹی ٹوئنٹی سیریز کے میچ بھی دیکھے گا۔ آسٹریلیا آئندہ سال مارچ میں مکمل سیریز کے لیے پاکستان کا دورہ کرے گا۔
واضح رہے کہ ویسٹ انڈیز کی ٹیم ٹی ٹوئنٹی اور ون ڈے سیریز کھیلنے کراچی پہنچ چکی ہے۔ پاکستان اور ویسٹ انڈیز کے درمیان پہلا ٹی ٹوئنٹی میچ 13 دسمبر کو کھیلا جائے گا۔
