اسلام آباد(ویب ڈیسک) وزیراعظم عمران خان نے نوجوانوں میں اسلامی تاریخ کے بارے میں آگاہی پیدا کرنے کے لیے جدید تکنیک اپنانے پر زور دیا ہے۔
یہ بات وزیراعظم نے فلمساز شہزاد نواز ، ترک پروڈیوسر ایمرے کونک ، سید جنید علی شاہ اور ڈاکٹر کاشف سے ایک ملاقات میں کہی ، جنہوں نے اسلام آباد میں ان سے ملاقات کی۔ ملاقات میں سینیٹر فیصل جاوید بھی موجود تھے۔
وزیراعظم عمران خان نے کہا کہ تاریخی کہانیوں پر ڈرامے اور فلمیں بنانے کی ضرورت ہے۔ انہوں نے کہا کہ صلاح الدین ایوبی ایک تاریخی کردار ہے جس کا حوالہ مغرب نے بھی دیا ہے۔
وزیر اعظم نے کہا کہ صلاح الدین ایوبی نے یروشلم کی تاریخی فتح کے بعد عام معافی کا اعلان کیا۔ انہوں نے کہا کہ صلاح الدین ایوبی کی زندگی پر بننے والی یہ سیریز نوجوانوں کو اس تاریخی کردار سے روشناس کرائے گی۔
ملاقات کے دوران وزیراعظم کو صلاح الدین ایوبی سیریز کے پاکستان ترکی مشترکہ منصوبے کے بارے میں بریفنگ دی گئی۔ انہیں بتایا گیا کہ سیریز کی منصوبہ بندی مکمل ہے جبکہ اس کی شوٹنگ اگلے سال اپریل میں شروع ہوگی۔
اس سے قبل وزیراعظم عمران خان نے یونیورسٹیوں میں اسلامی تاریخ پر بحث اور تحقیق شروع کرنے اور ثقافت کو منظر عام پر لانے کے لیے ایسے پروگراموں پر زور دیا تھا۔
وزیراعظم عمران خان نے آج دو روزہ قومی رحمت اللعالمین کانفرنس کے اختتامی سیشن سے خطاب کرتے ہوئے 12 ربیع الاول کے موقع پر شہروں کو سجانے میں حصہ لینے والوں کو خراج تحسین پیش کیا۔
