ن لیگی رکن روزینہ عالم خان پارٹی کی بنیادی رکنیت سے مستعفی ہو گئی ہیں۔
تفصیلات کے مطابق پاکستان مسلم لیگ ن کی روزینہ عالم نے پارٹی کی رکنیت سے استعفیٰ دے دیا، انھوں نے ن لیگ خواندگی کمیٹی کی چیئرپرسن شپ بھی چھوڑ دی۔
روزینہ عالم خان کا کہنا ہے کہ ایاز صادق کے بیان سے انھیں دکھ اور تکلیف ہوئی، جس کی وجہ سے پارٹی رکنیت چھوڑ رہی ہوں۔
یاد رہے کہ چند دن قبل مسلم لیگ ن صوبہ بلوچستان کے صدر عبدالقادر نے بھی ایاز صادق کے بیان اور پاکستان ڈیموکریٹک موومنٹ کے پلیٹ فارم سے پاک فوج کے خلاف نازیبا زبان کے استعمال کے بعد ن لیگ سے اپنی راہیں جدا کر لی تھیں۔
گزشتہ روزعبد القادر بلوچ نے کوئٹہ میں پریس کانفرنس میں کہا کہ میں اپنے چیف کے خلاف کوئی بات نہیں سُن سکتا، آج جو بھی عزت ہے وہ پاک فوج کی وجہ سے ہے، مستقبل کا فیصلہ مشاورت کے بعد کروں گا۔
ان کا کہنا تھا اگر نواب ثنا اللہ زہری مسلم لیگ ن میں نہیں ہوں گے تو میں بھی نہیں رہوں گا کیوں کہ وہ میرے بڑے اور اپنے فیصلے کے مالک ہیں، ایسی پارٹی کے ساتھ نہیں چل سکتا جس میں میرے فیصلوں کی وجہ سے نواب صاحب کی دل آزاری ہو۔
