جنوبی افغانستان کے شہر قندھار میں ایک مسجد میں دھماکے میں کم از کم 32 افراد ہلاک اور 53 دیگر زخمی ہوگئے ہیں۔
دھماکوں کی وجہ فوری طور پر واضح نہیں ہو سکی ۔
شہر کے مرکزی میروائزہسپتال کے ایک ڈاکٹر نے اے ایف پی کو بتایا: “ہمارے ہسپتال میں اب تک 32 لاشیں اور 53 زخمی لوگ لائے گئے ہیں۔”
دیگر طبی ذرائع اور ایک صوبائی عہدیدار نے 30 سے زائد افراد کی ہلاکت کی تصدیق کی ، اور کم از کم 15 ایمبولینسیں جائے وقوعہ سے زخمیوں کو لے کر گئی ہیں۔
دوسری طرف مسجد کے فیس بک اکاؤنٹ سے خون کے عطیات کی اپیل بھی کی گئی۔
ایک عینی شاہد نے اے ایف پی کو بتایا کہ اس نے تین دھماکے سنے ہیں ، ایک مسجد کے مرکزی دروازے پر ، دوسرا جنوبی علاقے میں اور تیسرا جہاں نمازی وضو کر رہے تھے۔
ایک اور گواہ نے یہ بھی بتایا کہ تین دھماکوں نے شہر کے وسط میں واقع مسجد کو جمعہ کی نماز کے دوران نشانہ بنایا ۔
وزارت داخلہ کے ترجمان قاری سید خوستی نے ٹویٹ کیا ، “ہمیں یہ جان کر دکھ ہوا ہے کہ قندھار شہرمیں شیعہ سنی بھائی چارے کی ایک مسجد میں دھماکہ ہوا ہے جس میں ہمارے کئی ہم وطن شہید اور زخمی ہوئے ہیں۔”
“امارت اسلامیہ کی خصوصی فورسز علاقے میں پہنچی ہیں تاکہ واقعہ کی نوعیت کا تعین کیا جا سکے اور مجرموں کو انصاف کے کٹہرے میں لایا جا سکے۔”
سوشل میڈیا پر پوسٹ کی گئی گرافک تصاویر ، جن کی فوری طور پر تصدیق نہیں ہو سکی ، میں فاطمیہ مسجد کے فرش پر لاشیں پڑی دکھائی گئیں۔
گزشتہ جمعہ کو اسلامک اسٹیٹ خراسان (داعش) کے خودکش بمبار نے قندوز میں ایک شیعہ مسجد کو نشانہ بنایا جس میں سیکڑوں افراد ہلاک ہوئے۔
اس گروپ نے ، جو طالبان کا ایک سخت حریف ہے ، نمازیوں کے خلاف حملوں کی ذمہ داری قبول کی ہے۔
